Ciufa

Stoi na banie ciufa i sapie 

Czorno spocono, śmiyra z ni kapie

I  ledwo dycho, charczy i chepie

Bo hajcer bergi miast wonglo ciepie

Ciepie i chepie fest jest wkurzony

Rzyć prawie goło, pysk zmaraszony

A w pierwszym wagonie wyrsze banioki

Siedzom i jedzom tuste krupnioki

Jedzom i glyndzom, słepiom, bleblajom

Trujom, cudujom, w zice dżistajom

W drugim wagonie same gorole

Co przyjechali na Śląsk na kole

I tak furgali po cugu ptice

Aże łobsiedli nojlepsze zice

Jedyn sie wkupioł drugi sie wżynioł 

I tak sie gorol na Śląsku plenioł

Dzisioj gorole rządzom już wszyndzie

W cugu, w robocie i we urzyndzie

W dalszych wagonach siedzą ślonzoki

Pnioki, hadziaje, krzoki, krojcoki

A we ty ciżbie same belery

Szpicle, agenty, swady, afery

A ze głośników gro melodyja

Ojca Rydzyka z Radia Maryja

A w całym cugu połno marasu

I nic do smiychu i nic do szpasu

Bo choćby przyszło tysiąc sprzątaczek

Kożdo by miała proszku sto paczek

Kibel, odkurzacz, ajaks i cif

To nie domyjom, taki to syf, taki to syf

Łoroz gwizd, Łoroz świst

Para buch, w motor gruch

Już gwizdnoł dyżurny, już hajcer za cypel

Szarpnoł i ciągnie do prawa już knypel

I para już ciśnie rułkami pod tłoki

I Piszczą już glajzy, i zgrzypią fest boki

Wichajstry śmigajom, telepie fest motor

A kola turkocom tak to to tak to to

Tak toto tak to to we cugu durś gro

A kaj to a kaj to, tak cug nom kaj gno

I bucho tak z niego smród bucho buch buch

Bo motor w nim stary i mocno już spuch

Lecz para kaj szpara, durś ciśnie sie tko

I tłoki w cylinrach pocisko  i pcho

I koła sie kryncom jak ktoś by je cis

Platforma to ciśnie, a może to Pis

A może to naród tak ciągnie i pcho

Tak to to, tak to to, tak to to i to