Murcek i płoczkorz

(pisownia fonetyczna)

Na kanwie wiersza A. Fredry

„Paweł i Gaweł”

W ślonski godce napisoł Marian Makula

Murcek z Płoczkorzem cuzamen jak w sztubie

Fedrowali wongel na Halembski grubie

I razym na szychta jeździeli na kole

Płoczkorz stoł na wierchu, a Murcek na dole

Murcek we ścianie jakby piźniony

Ryczoł i skokoł, zbrojoł patrony

Ciepoł na pancer wongel i rułki

I bergi, i szlauchy, i piosek z zamułki

Płuczkorz na wiyrchu ciynżko mioł fara

Jak mu na sita Murcek suł maras

Skokoł jak hazok, wywijoł salta

Co by nie sztopła maszyny malta

Az roz sie wkurzoł, dzwoni do ściany

Myni ciaplyty murcku kochany

Bo nom fedrujesz take gywichty

Że płoczka stanie przed końcym szychty

Murcek we ścianie guchy łod szumu

Dostoł łod afy chyba rozumu

Co komu do jymu to jymu do komu

Patrz się płoczkorzu swojego kromu

Płoczkorz do murcka nie rozwar gymby

Ciepnoł  telefon i zacis zymby.

Lecz klojzdnoł w malcie i dupnoł sztelong

Że napynd haltnoł wybioł ziherong 

Dzwoni na gora murcek wkurzony

Co tam robicie jasne pierony

I klnie, przezywo jak jasny grom

Wrzeszcy jak gupi załonczcie sztrom

Se poczekejcie na sztrom do czasu

Aż wypucuja sita z marasu

Co komu do jymu to jymu do komu

Fedrujcie se dzisioj na dole bez sztromu

Morał nasuwo się taki mi po tym

Nie żyjmy tu u nos jak pies ze kotym

Jak pies ze kotym, a wilk ze lisym

Tak jak platforma zyje ze pisym