Odezwa do braci hanysow
Maine libe kameraden i stało sie, że po 100 rokach kiśniyncio w poltońskim bigosie skuli braku ślonski kindersztuby, ślonski godki, ślonskigo myślynio i a przejde wszystkim widokow na rozwój Wierchnigo Ślonska, stworzyli my ZONŚ, czyli „Zakamuflowano Opcja Narodu Ślonskigo”.
Momy doś poltońskigo machanio szabelkom, pisowskigo kwaczynio i dryfowanio na dziurawy Platformie. Niy bydzie polton w gymba nom pluł i bajtli nom poltonioł.
My zakamuflowano opcja ślonski nacyje we piyrwszy raji żondomy:
- przywrocynio autonomiji nadany nom przez Parlamynt Najjaśniejszy Rzeczypospolity w dwadzieścia dziewiyńćsetnym roku;
- anszlusu Zaolzio do Horni Slesko, w zamian za co łoddomy pepikom Aldrajch ze Sosnowcym , Zawierciem i Dobrowom Górniczom;
- dostympu do morza bez korytarz do Gdańska i glajzow na banka do Szczecina. Chcymy jeżdzic na dansing do Danzig i bankom do Swaine Minde, co by sie łopolać na bałtyckich plażach przy muzyce kapeli Oberszlyjzyn z Piekor Ślonskich i przy ślonskich szlagrach Radia Piekary.
Niy chcymy sie duży ciorać w goczałkowickim, paprocańskim czy rybnickim bajorku, a nasze szify i pancerne kajaki z Dzierżna zacumujom wnet u norweskich fiordow.
Niy chcymy stolycy we wsi Warszawa. We wsi Warszawa zakwaterujemy Burdelswera do wachowanio naszego gyszeftu, a stolyca przeniesymy do Katowic.
Ślonskim kołym historii niy bydom kryncić pedały z koła Palikota, ale pancerne silniki Opla z Glajwitz i glans glace z Oberszlyjzyn Raistag w Katowicach.
Rozbudujemy furgowisko w Pyrzowicach, a nasze pancerne drachy i luftbalony przegoniom z nad ślonskigo nieba amerykańskie F zechcyn z demobilu.
Kombajnami z zawiyranych grub przekopiymy metro do San Gan Dolfo, by emerytowany papiyż Benedykt XVI mog łodprawiać co niedziela mszo w piekarski bazylice.
A kej na biołym koniu przyzubruje do nos z insygniami Fryderyka Barbarossy i Władyslawa Wygnańca potomek Princa pszczyńskigo Jana Henryka XV Hochberga księcia Von Ples i ogłosi Świynte Cesarstwo Rzymskie Narodu Ślonskigo, to koła naszych pancrow marki Opel z Glajwitz dojadom aż do muru chińskigo i Ślonsk bydzie siyngoł na zachod po Atlantic Ocean, i na wschod po Himalaje.
Kożdy, czy hanys, czy gorol, kery poprze anszlus wszyjskich ślonskich dziedzin, dostanie krowa do chowanio, familok do remontu i bałplac do posprzontanio.
W nowy ślonski rzeczywistości: myńszości to jest gorolom, chadziajom i innym nacyjom zagwarantujymy miejsca stojonce w autobusach i bankach i gratis bilet do stolycy.
Skończymy dach nad stadionem ślonskim, a na murawa wpuszczymy baranow kerzy dopusciyli do pauperyzacji naszego hajmatu, by gryżli trowa do przewidziany wysokości.
Nasze dzieci bydymy uczyć ślonski godki, żeby wiedziały czym rożni sie żurek łod żuru, krupniok łod kaszanki i soroństwo łod kindersztuby.
Wprowadzymy pruski dryl i zniszczymy polsko partyzantka, a partaczy wyślemy do przeciepanio pustyni błendowski z kupki na kupka. I to by było na tyla.
Spisoł ku pamiynci potomnym na wołowy skorze roku pańskigo cztyrnostego a dwutysiyncznego 19 Nowymbra we wsi Szwarcwald kole Fryncity w dziedzinie Ruda Ślonsko, posiadłości jeji wysokości prezidynt Grażyny Dziedzic
fest łoszkliwy poddany Hanys Anonim
Brak komentarzy:
Prześlij komentarz